जळगाव, प्रतिनिधी – शेतातील अवैध खोदकामाची तक्रार बंद करण्यासाठी १ लाख रुपयांच्या लाचेची मागणी करून तडजोडीअंती ५० हजार रुपये स्वीकारणाऱ्या नशिराबाद भागातील मंडळ अधिकाऱ्याला लाचलुचपत प्रतिबंधक विभागाने रंगेहाथ पकडले आहे. या कारवाईत एका खाजगी इसमाला देखील अटक करण्यात आली असून जळगावच्या रामानंदनगर पोलीस स्टेशनमध्ये गुन्हा नोंदवण्याची प्रक्रिया सुरू आहे.
नेमकी घटना काय?
तक्रारदार हे स्वतःच्या शेतात अवैध खोदकाम करत असल्याची तक्रार स्थानिक रहिवाशांनी तहसील कार्यालयात केली होती. ही तक्रार नंतर मागे घेण्यात आली होती, मात्र, या अर्जाची चौकशी बंद करण्याच्या मोबदल्यात नशिराबाद भागाचे मंडळ अधिकारी मिलींद प्रकाश देवरे (वय ३७) यांनी तक्रारदाराकडे १ लाख रुपयांच्या लाचेची मागणी केली होती. तडजोडीअंती ५० हजार रुपये देण्याचे ठरले.
पिंप्राळा तलाठी कार्यालयासमोर सापळा
मंडळ अधिकारी मिलींद देवरे यांनी लाचेची ही रक्कम खाजगी पंटर सुरेंद्र प्रल्हाद अहिरे (वय ३९) याच्याकडे देण्यास सांगितले. मंगळवारी, १२ मे २०२६ रोजी पिंप्राळा येथील तलाठी कार्यालयासमोर सुरेंद्र अहिरे याने तक्रारदाराकडून ५० हजार रुपये स्वीकारले असता, दबा धरून बसलेल्या लाचलुचपत प्रतिबंधक विभागाच्या पथकाने त्याला रंगेहाथ पकडले.
एसीबीचे पथक
ही कारवाई नाशिक ला.प्र.वि.चे पोलीस निरीक्षक राहुलकुमार नाईक आणि त्यांच्या पथकाने (प्रफुल्ल माळी, विलास निकम) केली. या प्रकरणाचा पुढील तपास जळगाव ला.प्र.वि.चे पोलीस निरीक्षक हेमंत नागरे करत आहेत. ही कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी आणि सुनील दोरगे यांच्या मार्गदर्शनाखाली करण्यात आली.
