धरणगाव (प्रतिनिधी): -येथील श्री संत कृपा वारकरी शिक्षण संस्थेच्या वतीने २१ मे ते २८ मे २०२६ या कालावधीत ‘भव्य वारकरी बालसंस्कार निवासी शिबिर’ आणि अधिकमास निमित्त ‘कीर्तन महोत्सवा’चे भव्य आयोजन करण्यात आले आहे. नवेगाव, तेली तलाव जवळील मारोती मंदिरात हा सोहळा पार पडणार असून, परिसरातील भाविकांमध्ये उत्साहाचे वातावरण आहे.
दैनंदिन भरगच्च कार्यक्रम
या महोत्सवादरम्यान दररोज पहाटे ४ ते ६ प्रभात फेरी व काकडा आरती, सायंकाळी ५ ते ६ हरीपाठ आणि रात्री ८.३० ते १०.३० या वेळेत नामवंत कीर्तनकारांची कीर्तने रंगणार आहेत.
ख्यातनामक कीर्तनकारांची मांदियाळी
सप्ताहाची सुरुवात २१ मे रोजी भागवताचार्य ह.भ.प. भावेश महाराज (विटणेकर) यांच्या कीर्तनाने होईल. त्यानंतर पुढीलप्रमाणे सेवा होतील – २२ मे : गायनगंधर्व ह.भ.प. लिलाधर महाराज ओझरकर, २३ मे: ज्ञानसिंधू ह.भ.प. ज्ञानेश्वर महाराज जळकेकर, २४ मे: कीर्तन केसरी ह.भ.प. मनोज महाराज एनगांवकर, २५ मे: संभाजीराजे चरीत्र व्याख्याते ह.भ.प. ज्ञानेश्वर महाराज पाळधीकर, २६ मे: गोप्रेमी ह.भ.प. गजानन महाराज वरसाडेकर, २७ मे: भागवताचार्य ह.भ.प. अतुल महाराज नारणेकर, २८ मे: सप्ताहाची सांगता महंत गायनगंधर्व ह.भ.प. अनिल महाराज धरणगावकर यांच्या काल्याच्या कीर्तनाने होईल.
विविध सेवांचे योगदान
या महोत्सवासाठी कलाकार मानधन, साऊंड सेवा, फुलहार, पत्रिका व संत निवास अशा विविध सेवा धरणगावातील दानशूर व्यक्ती व भाविकांकडून पुरस्कृत करण्यात आल्या आहेत.
आयोजक व नियोजन
या महोत्सवाच्या यशस्वीतेसाठी श्री संत कृपा वारकरी शिक्षण संस्था, माळी समाज पंच मंडळ, पाटील समाज पंच मंडळ, तिळवण तेली समाज पंच मंडळ, मराठे समाज पंच मंडळ आणि नवेगाव परिसरातील सर्व समाज बांधव परिश्रम घेत आहेत. या मंगलमय सोहळ्याचा लाभ घेण्याचे आवाहन आयोजकांनी केले आहे.
