तिरुवनंतपुरम, वृत्तसंस्था – केरळचे माजी मुख्यमंत्री आणि डाव्या आघाडीचे ज्येष्ठ नेते पिनराई विजयन यांच्या अडचणीत मोठी वाढ झाली आहे. अंमलबजावणी संचालनालयाने (ED) आज सकाळीच विजयन यांच्या तिरुवनंतपुरम येथील निवासस्थानासह राज्यभरातील तब्बल १२ ठिकाणांवर एकाच वेळी छापे टाकले. विजयन यांच्या कन्या टी. वीणा यांच्या आयटी कंपनीशी संबंधित कथित मनी लाँड्रिंग आणि बेकायदेशीर व्यवहारांप्रकरणी ही कारवाई करण्यात येत असल्याने केरळच्या राजकीय वर्तुळात प्रचंड खळबळजनक वातावरण निर्माण झाले आहे.
काय आहे संपूर्ण प्रकरण?
हा संपूर्ण वाद ‘कोचीन मिनरल्स अँड रुटाईल लिमिटेड’ या खाजगी कंपनी आणि विजयन यांच्या कन्या टी. वीणा यांच्या ‘एक्सालॉजिक सॉल्यूशन्स’ या आयटी कंपनीमधील संशयास्पद आर्थिक व्यवहारांशी संबंधित आहे. आरोपानुसार, २०१७ ते २०२० या कालावधीत सीएमआरआय कंपनीने टी. वीणा यांच्या कंपनीला तब्बल १.७२ कोटी रुपयांचे मासिक पेमेंट केले होते. विशेष म्हणजे, या आयटी कंपनीने सीएमआरआय ला कोणतीही सेवा किंवा सर्व्हिस पुरवली नसतानाही ही कोट्यवधी रुपयांची रक्कम देण्यात आली, असा ठपका ‘आयकर सेटलमेंट बोर्डा’ने ठेवला होता. याच संशयास्पद व्यवहारावरून ईडीने प्रिव्हेन्शन ऑफ मनी लाँड्रिंग ॲक्ट अंतर्गत गुन्हा दाखल करत हा तपास सुरू केला आहे.
उच्च न्यायालयाच्या हिरव्या कंदीलानंतर कारवाई तीव्र
कालच (मंगळवारी) केरळ उच्च न्यायालयाने या प्रकरणात हस्तक्षेप करण्यास नकार दिला होता. ‘सीएमआरआय’ कंपनीने ईडीच्या कारवाईला आव्हान देणारी आणि तपास रद्द करण्याची मागणी करणारी याचिका न्यायालयात दाखल केली होती, जी न्यायालयाने फेटाळून लावली. उच्च न्यायालयाकडून तपास सुरू ठेवण्यास हिरवा कंदील मिळताच, ईडीच्या १२ सदस्यीय पथकाने केंद्रीय सुरक्षा दलाचा कडक बंदोबस्तात आज पहाटेपासूनच केरळमध्ये शोधमोहीम तीव्र केली.
नातेवाईक आणि निकटवर्तीयांवरही पाश
ईडीने केवळ विजयन यांच्याच नव्हे, तर त्यांचे जावई आणि माजी मंत्री मोहम्मद रियास यांच्या कोझिकोड येथील घरावरही छापे मारले आहेत. तसेच कोच्ची येथील सीएमआरआय कंपनीचे कॉर्पोरेट ऑफिस आणि कंपनीचे व्यवस्थापकीय संचालक शशीधरन कार्था यांच्या मालमत्तांचीही झडती घेतली जात आहे. ईडीचे अधिकारी सध्या विजयन आणि त्यांची मुलगी वीणा यांची चौकशी करत असून डिजिटल पुरावे आणि कागदपत्रे गोळा करण्याचे काम युद्धपातळीवर सुरू आहे.
विजयन यांनी नुकतेच मुख्यमंत्री पदावरून पायउतार होत विरोधी पक्षनेतेपदाची धुरा सांभाळली आहे. त्यातच केंद्रीय तपास यंत्रणेने थेट त्यांच्या घरावर धडक दिल्याने राज्यातील सत्ताधारी आणि विरोधकांमध्ये आता आरोप-प्रत्यारोपांच्या फैरी झडू लागल्या आहेत.
