धरणगाव, (रवींद्र महाजन/प्रतिनिधी) – येथील सकल माळी समाजाच्यावतीने राष्ट्रपिता महात्मा ज्योतिबा फुले आणि विश्वरत्न डॉ. बाबासाहेब आंबेडकर यांच्या संयुक्त जयंतीनिमित्त भव्य व्याख्यानाचे आयोजन करण्यात आले आहे. मंगळवार, २८ एप्रिल २०२६ रोजी रात्री ८:३० वाजता ‘संत सावता माळी समाज मंदिर’ (मोठा माळी वाडा) येथे हा कार्यक्रम संपन्न होणार आहे.
या व्याख्यानासाठी प्रमुख वक्ते म्हणून अमळनेर येथील सुप्रसिद्ध शिव-फुले-शाहू-आंबेडकर विचारांचे गाढे अभ्यासक रामेश्वर भदाणे लाभले आहेत. ते याप्रसंगी ‘महामानवांच्या विचारांचा जागर’ या विषयावर आपले अभ्यासपूर्ण विचार मांडणार आहेत.
समता, शिक्षण, न्याय आणि मानवता या मूल्यांचा संदेश देणाऱ्या या दोन महामानवांच्या गुरु-शिष्यांच्या विचारांची आजच्या काळात असलेली गरज आणि त्यांचे सामाजिक योगदान यावर श्री.भदाणे हे प्रकाश टाकतील. या कार्यक्रमाच्या माध्यमातून समाजातील विचारांचा दीप प्रज्वलित करण्याचा प्रयत्न आयोजकांनी केला आहे. या व्याख्यानाचा लाभ सर्व नागरिकांनी घेण्याचे आवाहन सकल माळी समाज, धरणगाव यांच्या वतीने करण्यात आले आहे.
