जळगाव, प्रतिनिधी: सरकारी आणि खासगी क्षेत्रातील करिअरचे स्वप्न पाहणाऱ्या दिव्यांग, अनाथ, ट्रान्सजेंडर आणि आर्थिकदृष्ट्या दुर्बल घटकातील विद्यार्थ्यांसाठी दीपस्तंभ फाऊंडेशनने मदतीचा हात पुढे केला आहे. संस्थेच्या ‘मनोबल’ प्रकल्पांतर्गत स्पर्धा परीक्षांच्या विनामूल्य प्रशिक्षणासाठी राष्ट्रीय स्तरावरील प्रवेश परीक्षेचे आयोजन ५ जून आणि २१ जून २०२६ रोजी करण्यात आले आहे.
पात्रता आणि परीक्षेचे स्वरूप
या प्रवेश परीक्षेसाठी १८ वर्षांवरील विद्यार्थी, बारावी उत्तीर्ण किंवा पदवीधर तरुण पात्र असतील. विशेषतः दिव्यांग, अनाथ, तृतीयपंथी आणि आर्थिकदृष्ट्या मागास प्रवर्गातील विद्यार्थ्यांना या उपक्रमात प्राधान्य दिले जाते. ही परीक्षा देशातील प्रमुख शहरांमध्ये ‘ऑफलाईन’ पद्धतीने पार पडणार असून ती पूर्णपणे विनामूल्य आहे.
कोणत्या परीक्षांचे मिळणार प्रशिक्षण?
निवड झालेल्या विद्यार्थ्यांना लेखी परीक्षा आणि मुलाखतीद्वारे निवासी तसेच ऑनलाइन स्वरूपात मार्गदर्शन दिले जाईल. यात प्रामुख्याने:
सरकारी नोकरी: UPSC, MPSC, SSC (स्टाफ सिलेक्शन), बँकिंग, रेल्वे.
उच्च शिक्षण: CLAT, MBA, CUET, CET, लॉ, इंजिनिअरिंग.
भाषा: मराठी, हिंदी आणि इंग्रजी अशा तीनही माध्यमांतून मार्गदर्शन उपलब्ध असेल.
सुविधांची वैशिष्ट्ये
पुणे, जळगाव आणि दिल्ली येथे कार्यरत असलेल्या या प्रकल्पात विद्यार्थ्यांना अद्ययावत अभ्यास साहित्य, तंत्रज्ञानाधारित सुविधा आणि वैयक्तिक समुपदेशन दिले जाते. सध्या १६ राज्यांतील सुमारे ६०० विद्यार्थी या सुविधेचा लाभ घेत आहेत.
असा करा अर्ज:
इच्छुक विद्यार्थ्यांनी www.deepstambh.org या संकेतस्थळावर जाऊन आपला अर्ज नोंदवायचा आहे. अर्ज करण्याची अंतिम मुदत १ जून २०२६ आहे. जास्तीत जास्त गरजूंनी या संधीचा लाभ घ्यावा, असे आवाहन दीपस्तंभ फाऊंडेशनतर्फे करण्यात आले आहे.
