धरणगाव / मुंबई, प्रतिनिधी – धरणगाव शहराच्या विकासासाठी अत्यंत महत्त्वाचा आणि अनेक वर्षांपासून प्रलंबित असलेला सांडपाणी व्यवस्थापन प्रकल्प अखेर मार्गी लागण्याच्या दिशेने निर्णायक पाऊल पडले आहे. स्वच्छ भारत अभियान (नागरी) २.० अंतर्गत वापरलेल्या पाण्याच्या व्यवस्थापन प्रकल्पांच्या अंमलबजावणीसाठी राज्य शासनाने ३ ऑगस्ट २०२६ रोजी सविस्तर मार्गदर्शक सूचना जारी केल्यानंतर धरणगाव नगरपरिषदेच्या प्रस्तावित मलनिस्सारण प्रकल्पालाही मोठी गती मिळाली आहे. यामागे जळगाव जिल्ह्याचे पालकमंत्री तथा राज्याचे पाणीपुरवठा व स्वच्छता मंत्री ना. गुलाबराव पाटील यांनी केलेला सातत्यपूर्ण आणि प्रभावी पाठपुरावा निर्णायक ठरल्याची भावना व्यक्त होत आहे.
पालकमंत्र्यांच्या प्रयत्नांना मिळाले यश
धरणगाव शहरातील सांडपाण्याची समस्या कायमस्वरूपी निकाली काढण्याचा निर्धार करून पालकमंत्री ना. गुलाबराव पाटील यांनी शासनाच्या विविध स्तरांवर सातत्याने पाठपुरावा केला. त्यांच्या प्रयत्नांमुळे धरणगाव नगरपरिषदेने सादर केलेल्या मलनिस्सारण योजनेच्या सविस्तर प्रकल्प अहवालाला महाराष्ट्र जीवन प्राधिकरण, नाशिक यांनी तांत्रिक मान्यता दिली. त्यामुळे शहराच्या पर्यावरणीय आणि आरोग्यविषयक विकासाला नवी दिशा मिळणार आहे.
१२.४९ कोटींच्या अत्याधुनिक प्रकल्पाची वैशिष्ट्ये
या महत्त्वाकांक्षी प्रकल्पामध्ये ६ एमएलडी क्षमतेचे आधुनिक MMBR तंत्रज्ञानाधारित मलजल प्रक्रिया केंद्र उभारण्यात येणार आहे. तसेच Interception & Diversion प्रणालीद्वारे नाल्यांमधील सांडपाणी प्रक्रिया केंद्राकडे वळविण्यात येईल. संपूर्ण प्रकल्पाची अंदाजित किंमत १२.४९ कोटी असून, आधुनिक तंत्रज्ञानामुळे सांडपाण्याचे वैज्ञानिक पद्धतीने शुद्धीकरण करून त्याचा पुनर्वापर शक्य होणार आहे.
शासनाच्या नव्या धोरणामुळे प्रकल्पांना वेग
नगर विकास विभागाने जारी केलेल्या मार्गदर्शक सूचनांमध्ये राज्यभरातील STP, Sewer Network आणि Interception & Diversion प्रकल्पांसाठी स्पष्ट कार्यपद्धती निश्चित करण्यात आली आहे. प्रकल्प नियोजन, गुणवत्ता नियंत्रण, तांत्रिक मान्यता, संचालन आणि देखभाल यासाठी स्वतंत्र निकष निश्चित करण्यात आल्याने प्रकल्प वेळेत आणि गुणवत्तापूर्ण पद्धतीने पूर्ण होण्यास मदत होणार आहे.
स्वच्छ धरणगाव, निरोगी धरणगाव
प्रकल्प पूर्ण झाल्यानंतर शहरातील दूषित सांडपाणी थेट नाल्यांमध्ये किंवा नैसर्गिक जलस्रोतांमध्ये जाणार नाही. त्यामुळे जलप्रदूषण कमी होईल, दुर्गंधी आणि डासांचा प्रादुर्भाव आटोक्यात येईल तसेच नागरिकांच्या आरोग्याचे संरक्षण होईल. प्रक्रिया केलेल्या पाण्याचा वापर उद्याने, वृक्षसंवर्धन, रस्ते धुणे, बांधकामे आणि इतर सार्वजनिक कामांसाठी होणार असल्याने पाण्याची बचतही मोठ्या प्रमाणात होणार आहे.
धरणगावच्या विकासात नवा मैलाचा दगड
धरणगाव शहराला आधुनिक आणि पर्यावरणपूरक पायाभूत सुविधा उपलब्ध करून देण्याच्या दिशेने हा प्रकल्प मैलाचा दगड ठरणार आहे. शहराच्या दीर्घकालीन विकासासाठी पालकमंत्री ना. गुलाबराव पाटील यांनी दाखविलेली विकासदृष्टी, सातत्यपूर्ण पाठपुरावा आणि शासनस्तरावरील प्रभावी समन्वयामुळे हा प्रकल्प प्रत्यक्षात येण्याचा मार्ग मोकळा झाला आहे. शहराच्या स्वच्छता, पर्यावरण आणि सार्वजनिक आरोग्य व्यवस्थेत या प्रकल्पामुळे गुणात्मक बदल अपेक्षित आहेत.
‘स्वच्छ आणि हरित महाराष्ट्र’ हेच लक्ष्य – ना.पाटील
“स्वच्छता, सार्वजनिक आरोग्य आणि पर्यावरण संवर्धन यांचा परस्परांशी घनिष्ठ संबंध आहे. धरणगावसह राज्यातील सर्व शहरांमध्ये आधुनिक मलजल प्रक्रिया सुविधा उभारून सांडपाण्याचे शास्त्रोक्त व्यवस्थापन, जलस्रोतांचे संरक्षण आणि प्रक्रिया केलेल्या पाण्याचा पुनर्वापर वाढविण्यास शासन कटिबद्ध आहे. धरणगावच्या या महत्त्वपूर्ण प्रकल्पासाठी मी सातत्याने पाठपुरावा केला असून, शासनाच्या नव्या धोरणामुळे या योजनेला मोठी गती मिळाली आहे. हा प्रकल्प पूर्ण झाल्यानंतर धरणगाव स्वच्छ, सुंदर आणि पर्यावरणपूरक शहर म्हणून विकसित होईल,” असे पालकमंत्री ना. गुलाबराव पाटील यांनी सांगितले.
