धरणगाव, प्रतिनिधी – शहरातील मोठा माळीवाडा परिसरात आज सिकलसेल आजाराच्या तपासणीसाठी विशेष सर्वेक्षण मोहीम राबविण्यात आली. धरणगाव ग्रामीण रुग्णालयाच्या वतीने आयोजित या उपक्रमात एमपीडब्ल्यू महेंद्र पंढरीनाथ माळी यांनी घरोघरी भेट देत नागरिकांची प्राथमिक तपासणी करून आवश्यक माहिती संकलित केली.
सिकलसेल हा आनुवंशिक आजार असल्याने त्याची लवकर ओळख होणे अत्यंत गरजेचे आहे. या सर्वेक्षणाच्या माध्यमातून मोठा माळीवाडा परिसरात राहणाऱ्या प्रत्येकांच्या आरोग्याची नोंद घेण्यात आली. पुढील टप्प्यात संबंधित नागरिकांना वैद्यकीय तपासणी, उपचार व योग्य मार्गदर्शन देण्यात येणार आहे. या आरोग्य मोहिमेमुळे नागरिकांमध्ये सिकलसेलबाबत जनजागृती वाढण्यास मदत होत असून, भविष्यातील गंभीर आजार टाळण्यासाठी हा उपक्रम उपयुक्त ठरणार आहे. परिसरातील प्रत्येक नागरिकांनी या उपक्रमाला उत्स्फूर्त प्रतिसाद देत प्रशासनाला सहकार्य करावे असे आवाहन ग्रामीण रुग्णालयाचे एम.पी.डब्ल्यू. कर्मचारी महेंद्र माळी यांनी केले.
