मुंबई, प्रतिनिधी – महाराष्ट्र शासनाच्या महत्त्वाकांक्षी ‘मुख्यमंत्री माझी लाडकी बहीण’ योजनेअंतर्गत मे महिन्याचे अनुदान लाभार्थी महिलांच्या बँक खात्यात जमा होण्यास सुरुवात झाली आहे. मागील काही दिवसांपासून लाभार्थी महिला या हप्त्याची वाट पाहत होत्या, त्यांच्यासाठी ही मोठी दिलासादायक बातमी आहे.
मिळालेल्या माहितीनुसार, राज्य शासनाने यासाठीची आवश्यक निधी प्रक्रिया पूर्ण केली असून, टप्प्याटप्प्याने महिलांच्या खात्यात थेट लाभ हस्तांतरण द्वारे पैसे जमा केले जात आहेत. येत्या दोन दिवसांत राज्यातील सर्व पात्र लाभार्थी महिलांच्या खात्यात अनुदानाची रक्कम जमा होईल, अशी माहिती संबंधित विभागाकडून देण्यात आली आहे.
महिलांमध्ये उत्साहाचे वातावरण
या योजनेमुळे राज्यातील लाखो महिलांना आर्थिक बळ मिळत आहे. ऐन महागाईच्या काळात शासनाकडून मिळणाऱ्या या आधारामुळे महिला वर्गात समाधानाचे वातावरण आहे. अनेक महिलांनी आपल्या खात्यात पैसे जमा झाल्याबद्दल शासनाचे आभार मानले आहेत.
तांत्रिक अडचण असल्यास काय करावे?
ज्या महिलांच्या खात्यात पैसे जमा झाले नाहीत, त्यांनी घाबरून न जाता या बाबींची खात्री करावी, बँक खाते आधार कार्डशी लिंक आहे का?, बँकेचे केवायसी पूर्ण आहे का?, डीबीटी सुविधा सक्रिय आहे का? कोणत्याही अडचणीच्या प्रसंगी लाभार्थ्यांनी आपल्या भागातील अंगणवाडी सेविका किंवा जवळच्या सेतु केंद्राशी संपर्क साधावा, असे आवाहन प्रशासनाकडून करण्यात आले आहे.
