मुंबई, प्रतिनिधी – लंडन येथून मायदेशी परतलेल्या डाॅ.संग्राम पाटील यांना मुंबई विमानतळावर उतरताच पोलिसांनी ताब्यात घेतले आहे. पहाटे दोन वाजता ही कारवाई करण्यात आली. दुपार पर्यंत डाॅ.पाटील यांची सपत्नीक चौकशी सुरू होती. या कारवाईमुळे खळबळ उडाली असून संताप व्यक्त केला जात आहे.
एरंडोल येथील मुळ रहिवासी असलेले डॉ.संग्राम पाटील हे सध्या लंडन मध्ये वास्तव्यास आहेत. सातत्याने सत्य, निर्भीड आणि स्पष्ट भूमिका मांडण्यासाठी ते प्रसिद्ध आहेत. एक उत्तम भारतीय जे आता लंडनवासी आहेत त्यांच्यामध्ये डॉ. संग्राम पाटील यांचे नाव अग्रणी आहे. संग्राम पाटील सोशल मीडियावर भाजप विरोधात आक्रमक भूमिका मांडण्यासाठी ओळखले जातात. मात्र, त्यांना अटक करण्यात आलेली नसून केवळ चौकशीसाठी बोलावण्यात आल्याचे मुंबई गुन्हे शाखेने स्पष्ट केले आहे. डॉक्टर संग्राम पाटील यांच्या नावावर सायबर क्राईम विभागात माहिती तंत्रज्ञान अंतर्गत गुन्हा दाखल असून, त्याच अनुषंगाने त्यांच्या विरोधात ‘लूक आऊट सर्क्युलर’ जारी करण्यात आले होते. पोलीस त्यांच्याकडून चांगल्या वागणुकीचा बॉण्ड लिहून घेऊन त्यांना अटी आणि शर्ती घालून सोडले जाईल अशी शक्यता व्यक्त केली जात आहे. राज्यातील अनेक विधीज्ञ डॉ. संग्राम पाटील यांच्या संपर्कात आहेत. संग्राम पाटील यांना कोणतीही कायदेशीर मदत लागल्यास तशी पावले उचलण्यात येतील असे सामाजीक चळवळीत काम करणाऱ्या अनेकांनी म्टहटलं आहे.
