धरणगाव, दि. २३ मे (प्रतिनिधी): येथील समस्त भाविकांचे आराध्य दैवत असलेल्या ऐतिहासिक श्री बालाजी महाराज मंदिरात आज, शनिवार दि. २३ मे रोजी जैन मुनी युगल आदरणीय आचार्य श्री १०८ अमोघकिर्तीजी महाराज आणि आचार्य श्री १०८ अमरकिर्तीजी महाराज यांनी सदिच्छा भेट दिली. याप्रसंगी त्यांनी श्री बालाजी भगवंतांचे भावपूर्ण दर्शन घेतले.
या भेटीदरम्यान जैन मुनींनी धरणगाव येथे सुरू असलेल्या श्री बालाजी मंदिराच्या भव्य नवीन जीर्णोद्धाराच्या आणि नूतनीकरणाच्या कामाची अतिशय बारकाईने पाहणी केली. मंदिराचे उत्कृष्ट स्थापत्य आणि भव्य सभागृहाचे काम पाहून आचार्यश्रींनी आनंद व्यक्त केला, तसेच सुरू असलेल्या या धार्मिक व सामाजिक कार्याची मनःपूर्वक प्रशंसा करून कौतुक केले.
संत-महंतांची उपस्थिती
या मंगलप्रसंगी श्री १००८ महामंडलेश्वर श्री भगवान बाबा प्रामुख्याने उपस्थित होते. त्यांच्या उपस्थितीमुळे या भेटीला एका आगळ्यावेगळ्या आध्यात्मिक सोहळ्याचे स्वरूप प्राप्त झाले होते.
भाविकांची मोठी उपस्थिती
जैन मुनी युगल यांच्या आगमनप्रसंगी श्री बालाजी वहन व्यवस्थापक मंडळाचे सर्व सन्माननीय विश्वस्त, पदाधिकारी आणि धरणगाव परिसरातील भाविक रसिक मोठ्या संख्येने उपस्थित होते. मंदिर प्रशासनाच्या वतीने पूजनीय आचार्यश्रींचे उत्साहात स्वागत करण्यात आले. या सदिच्छा भेटीमुळे धरणगाव शहरात सर्वधर्मसमभावाचे आणि आस्थेचे एक सुखद वातावरण पाहायला मिळाले.
