धरणगाव, प्रतिनिधी – गेल्या दोन ते तीन महिन्यांपासून धरणगाव शहर आणि तालुक्यातील नागरिक गॅस टंचाईमुळे त्रस्त झाले आहेत. गॅस सिलिंडर वितरणात मोठ्या प्रमाणावर भ्रष्टाचार आणि काळाबाजार होत असल्याचा आरोप करत आज शिवसेनेच्या वतीने गॅस एजन्सी कार्यालय आणि गोदामावर जोरदार ‘घेराव आंदोलन’ करण्यात आले. शिवसेनेच्या या आक्रमक पवित्र्यामुळे प्रशासनाची आणि एजन्सी चालकांची चांगलीच पळापळ झाली.
१,५०० ते २,००० रुपयांना ब्लॅकने सिलिंडरची विक्री!
धरणगाव शहर व परिसरात गॅस सिलिंडर मिळणे कठीण झाले असून, महिला भगिनींना आणि नागरिकांना तीव्र त्रासाला सामोरे जावे लागत आहे. असे असताना दुसरीकडे मात्र १५०० ते २००० रुपयांना गॅस सिलिंडर सर्रासपणे ‘ब्लॅक’ने (काळ्या बाजारात) विकला जात असल्याचा गंभीर आरोप शिवसेनेने केला आहे. गॅस वितरणात प्रचंड वशिलेबाजी सुरू असून सर्वसामान्यांना डावलले जात असल्याने शिवसैनिकांनी आणि संतप्त नागरिकांनी एजन्सी वितरकांना जागेवरच धारेवर धरले.
तीन महिन्यांच्या स्टॉकची होणार चौकशी
या गंभीर प्रकरणाची दखल घेत इंडियन ऑइल कंपनीच्या एरिया मॅनेजरशी तात्काळ संपर्क साधण्यात आला आहे. मागील तीन महिन्यांत एजन्सीकडे आलेला गॅसचा स्टॉक आणि प्रत्यक्षात झालेले वितरण याची सविस्तर माहिती मागवण्यात आली असून, यामध्ये मोठा घोटाळा बाहेर येण्याची शक्यता वर्तवली जात आहे.
दोषींवर थेट गुन्हे दाखल करणार : पुरवठा अधिकारी
आंदोलनाची दखल घेत पुरवठा अधिकारी श्रीमती कांबळे आणि श्री. मोरे यांनी घटनास्थळी भेट दिली. “नागरिकांची तक्रार आल्यास आम्ही जनतेला पूर्ण न्याय देऊ. गॅस वितरणात जो कोणी दोषी आढळेल, त्याच्यावर थेट गुन्हा दाखल केला जाईल,” असा इशारा पुरवठा अधिकारी श्रीमती कांबळे यांनी दिला आहे.
१५ दिवसांत घरपोच सेवा सुरळीत करण्याचे आश्वासन
शिवसेनेचा आक्रमक अवतार आणि नागरिकांचा रोष पाहून गॅस एजन्सीच्या वितरक श्रीमती मुथा यांनी नमती भूमिका घेतली. “नागरिकांच्या समस्यांवर लवकरच तोडगा काढला जाईल. येत्या १५ दिवसांत घरपोच गॅस वितरण सेवा पूर्णपणे सुरळीत करून नागरिकांना वेळेवर सिलिंडर उपलब्ध करून दिले जातील,” असे आश्वासन त्यांनी लेखी निवेदनाद्वारे दिले.
शिवसेना आणि युतीचे पदाधिकारी मैदानात
या आंदोलनाचे नेतृत्व शिवसेना शहर प्रमुख धीरेंद्र पुरभे यांनी केले. याप्रसंगी बाळू जाधव, सोनु महाजन, मोनु महाजन, रवि कंखरे, नगरसेवक तौसीफ पटेल, बुट्या पाटील, रवि महाजन, शिरीष आप्पा बयस, टोनी महाजन, सद्दामभाई, मॉन्टी चव्हाण, हेमराज चौधरी यांच्यासह शिवसेना आणि महायुतीचे अनेक प्रमुख पदाधिकारी, कार्यकर्ते आणि नागरिक मोठ्या संख्येने उपस्थित होते. ‘गोरगरिबांचा गॅस अडवणाऱ्यांची गय केली जाणार नाही,’ असा इशारा शेवटी शिवसेनेच्या वतीने देण्यात आला.
