धरणगाव, प्रतिनिधी – उत्तर महाराष्ट्रातील एक महत्त्वाचे आणि वर्दळीचे रेल्वे स्थानक म्हणून ओळखल्या जाणाऱ्या धरणगाव रेल्वे स्टेशनवर प्रवाशांच्या सुरक्षेचा प्रश्न ऐरणीवर आला होता. वाढती रहदारी, रेल्वे प्रवाशांची सुरक्षा, चोरी आणि अनुचित प्रकारांना आळा घालण्यासाठी धरणगाव येथे ‘रेल्वे सुरक्षा बल’ (RPF) चे स्वतंत्र आउटपोस्ट सुरू करणे अत्यंत गरजेचे बनले होते. हीच जनहितार्थ आणि अत्यंत महत्त्वाची मागणी पश्चिम रेल्वेचे महानिरीक्षक तथा प्रधान मुख्य सुरक्षा आयुक्त अजय सादानी यांच्या दरबारी यशस्वीरीत्या मांडण्यात आली आहे. पश्चिम रेल्वेच्या मुंबई येथील मुख्यालयात झोनल रेल्वे युजर्स कन्सल्टेटिव्ह कमिटीचे सदस्य तथा धरणगावचे तरुण आणि जनमानसात लोकप्रिय असलेले युवा नेते प्रतिक जैन यांनी ही भेट घेत या महत्त्वाच्या विषयावर सविस्तर चर्चा केली. त्यांच्या या धडाडीच्या आणि प्रभावी पाठपुराव्यामुळे धरणगाव रेल्वे स्थानकात आरपीएफ आऊटपोस्ट सुरू होण्याच्या आशा पल्लवीत झाल्या आहेत.
प्रवाशांच्या सुरक्षेसाठी आक्रमक भूमिका
धरणगाव रेल्वे स्थानकातून दररोज शेकडो प्रवासी प्रवास करतात. लांब पल्ल्याच्या गाड्या असोत किंवा पॅसेंजर गाड्या, प्रवाशांची सतत ये-जा सुरू असते. मात्र, रेल्वे स्थानक आणि फलाटांवर सुरक्षा यंत्रणेचा अभाव असल्यामुळे महिला, ज्येष्ठ नागरिक आणि सामान्यांच्या सुरक्षेचा प्रश्न कायमच ऐरणीवर राहिला आहे. या सर्व गोष्टींची गांभीर्याने दखल घेत ZRUCC मेंबर प्रतिक जैन यांनी सातत्याने या प्रश्नाचा पाठपुरावा सुरू ठेवला होता. याच मालिकेतील एक महत्त्वपूर्ण टप्पा म्हणून त्यांनी मुंबई येथे जाऊन पश्चिम रेल्वेचे महानिरीक्षक तथा प्रधान मुख्य सुरक्षा आयुक्त अजय सादानी यांची प्रत्यक्ष भेट घेतली.
या उच्चस्तरीय भेटीदरम्यान प्रतीक जैन यांनी धरणगाव रेल्वे स्थानकावरील प्रवाशांची वाढती संख्या, परिसराची भौगोलिक रचना आणि सुरक्षिततेच्या अनुषंगाने निर्माण होणाऱ्या अडचणींचा सविस्तर पाढा वाचला. त्यांनी अतिशय अभ्यासपूर्ण पद्धतीने अधिकाऱ्यांसमोर हा मुद्दा मांडला की, धरणगाव हे केवळ प्रवाशांच्या दृष्टीनेच नव्हे, तर व्यापारी दृष्टिकोनातूनही एक महत्त्वाचे केंद्र आहे. अशा ठिकाणी रात्री-अपरात्री येणाऱ्या-जाणाऱ्या प्रवाशांसाठी रेल्वे सुरक्षा बळाची (RPF) उपस्थिती असणे ही काळाची गरज आहे.
महानिरीक्षक अजय सादानी यांच्याकडून सकारात्मक प्रतिसाद
ZRUCC मेंबर प्रतीक जैन यांनी मांडलेला हा अत्यंत संयुक्तिक आणि जनहिताचा विषय पश्चिम रेल्वेचे महानिरीक्षक अजय सादानी यांनी अत्यंत गांभीर्याने ऐकून घेतला. प्रवाशांची सुरक्षा ही रेल्वे प्रशासनासाठी सर्वोच्च प्राथमिकता असल्याचे सांगत, श्री. सादानी यांनी धरणगाव रेल्वे स्थानकावर RPF आउटपोस्ट सुरू करण्याच्या प्रस्तावावर तातडीने आणि अनुकूल कार्यवाही करण्याचे आश्वासन दिले. अधिकाऱ्यांच्या या सकारात्मक प्रतिसादांमुळे धरणगाववासीयांच्या अनेक वर्षांच्या प्रलंबित मागणीला न्याय मिळण्याचा मार्ग मोकळा झाला आहे.
प्रतीक जैन:जनतेच्या प्रश्नांवर सदैव तत्पर असणारे अभ्यासू नेतृत्व
या संपूर्ण घडामोडीनंतर धरणगाव शहर आणि परिसरात ZRUCC मेंबर प्रतिक जैन यांच्या कार्याचे कौतुक होत आहे. पदावर केवळ मिरवून न घेता, जनतेच्या अडीअडचणींना थेट उच्चपदस्थ अधिकाऱ्यांपर्यंत पोहोचवून त्या सोडवून घेण्यात प्रतीक जैन यांनी नेहमीच पुढाकार घेतला आहे.
रेल्वे प्रवाशांच्या सुरक्षिततेचा हा प्रश्न हाती घेऊन तो थेट पश्चिम रेल्वेच्या महानिरीक्षकांपर्यंत नेण्याचे कसब केवळ एका अभ्यासू आणि प्रवाशांच्या हिताची तळमळ असलेल्या प्रतिनिधी कडेच असू शकते, अशा शब्दांत धरणगावमधील नागरिक, व्यापारी वर्ग आणि रेल्वे प्रवासी संघटनांनी प्रतीक जैन यांच्या विषयी भावना व्यक्त केल्या आहेत. प्रतिक जैन यांच्या पाठपुराव्यामुळे धरणगाव रेल्वे स्थानकाचा कायापालट होण्यास मदत होत असून, प्रवाशांना एक निर्भय आणि सुरक्षित प्रवास अनुभवता येणार आहे.
स्थानिक नागरिकांमध्ये आनंदाचे वातावरण
धरणगाव रेल्वे स्थानकावर आरपीएफ आऊटपोस्ट सुरू झाल्यास कायदा व सुव्यवस्था अबाधित राहील, असा विश्वास व्यक्त केला जात आहे. या निर्णयामुळे गैरप्रकारांना आळा बसेल आणि महिला भगिनींना अधिक सुरक्षित वातावरण मिळेल. प्रतीक जैन यांच्या अथक प्रयत्नांमुळे हा ऐतिहासिक प्रश्न मार्गी लागण्याच्या मार्गावर असल्याबद्दल संपूर्ण धरणगाव तालुक्यातून त्यांच्यावर अभिनंदनाचा वर्षाव होत आहे.
